Xalq bankining ustav kapitali oshirilmoqda

O’zbekiston Respublikasi Moliya vazirligi va O’zbekiston Respublikasi Markaziy bankining 2015-2017-yillarda Davlat-tijorat Xalq bankining ustav kapitalini 185 milliard so’mga oshirish va uning umumiy hajmini 385 milliard so’mga yetkazish to’g’risidagi taklifi mamlakatimiz rahbarining shu yil 25-martdagi “O’zbekiston Respublikasi davlat-tijorat Xalq bankining kapitallashtirish darajasini yanada oshirish chora-tadbirlari to’g’risida”gi farmoni bilan tasdiqlandi, deya xabar beradi Uzbekistan Today axborot agentligi.

Bugungi kunda O’zbekiston Respublikasi Davlat-tijorat Xalq banki jadal sur’atlarda rivojlanayotgan ko’ptarmoqli yirik bank sanaladi hamda respublikamizning har bir tumanida o’z filiallariga ega. Shu yilning 31-mart holatiga ko’ra, kredit tashkilotining chekka va borish qiyin bo’lgan manzillarda 32 ta minibanki va 1332 ta qo’shimcha muassasasi faoliyat ko’rsatmoqda.

Hozirgi vaqtda bank aktivlari 3,063 trillion so’m, depozit bazasi 2,428 trillion so’m, kredit portfeli 1,652 trillion so’mni tashkil etadi.

Bank aksiyalari amaldagi aksiyadorlarning ulushiga mutanosib ravishda – Moliya vazirligi (51 foiz) va Markaziy bank (49 foiz) o’rtasida taqsimlanadi. Bankning o’z foydasini kapitallashtirish, taqdim etiladigan soliq imtiyozlari, bo’sh qoladigan mablag’larni maqsadli yo’naltirish orqali Moliya vazirligining ulushini shakllantirish, qisman davlat byudjeti, shuningdek, Markaziy bank foydasining respublika byudjetiga yo’naltiriladigan bir qismi va o’z mablag’lari Xalq banki ustav kapitalini qo’shimcha shakllantirish manbalari sifatida belgilandi.

“Jahon” AA