VATAN BO‘YLAB SAYOHAT

“Sog‘lom avlod uchun” xalqaro xayriya fondi tomonidan tashkil etilayotgan turli ma’naviy-ma’rifiy tadbirlar, loyihalar kam ta’minlangan, o‘zgalar e’tiboriga muhtoj bolalarni Vatanga muhabbat, milliy qadriyatlarimizga hurmat ruhida tarbiyalashga xizmat qilmoqda.

“O‘zbekiston temir yo‘llari” aksiyadorlik jamiyati va O‘zbekiston Respublikasi Xalq ta’limi vazirligi bilan hamkorlikda tashkil etilayotgan "Ona Vatan tarixi" shiori ostidagi sayohatlarda Mehribonlik uylari tarbiyalanuvchilari va kam ta’minlangan oilalar farzandlari yurtimizning qadimiy shaharlari, mustaqillik yillarida barpo etilgan inshootlar bilan tanishish, o‘zlarining bilim va salohiyatini oshirish imkoniga ega bo‘lmoqda.

Poytaxtimizdagi Mehribonlik uylari tarbiyalanuvchilarining Samarqand shahriga sayohati uyushtirildi. Qishki ta’til kunlarida o‘quvchilar uchun munosib tuhfa bo‘lgan ushbu sayohat davomida o‘g‘il-qizlar qadimiy va navqiron Samarqand haqida ko‘plab ma’lumotlar bilan tanishdi.

– Biz sayohat davomida Samarqand shahri tarixi, me’moriy obidalari haqida olam-olam taassurot oldik, – deydi 22-Mehribonlik uyi tarbiyalanuvchisi Sabina Karimova. – Samarqand haqida kitoblarda ko‘p o‘qiganman, kinolarda ko‘rganman. Lekin bu yerda bo‘lish, buyuk ajdodlarimiz dahosining mahsuli bo‘lgan tarixiy obidalarni o‘z ko‘zing bilan ko‘rish, shahar bo‘ylab sayohat qilishning gashti bo‘lakcha bo‘lar ekan.

O’zA