Пекинда Ўзбекистоннинг савдо-иқтисодий, инвестициявий ва туризм салоҳияти тақдим этилди

Мамлакатимизнинг Хитойдаги элчихонасида Ўзбекистоннинг савдо-иқтисодий, инвестициявий ва туризм салоҳиятига бағишланган тақдимот ўтказилди, деб хабар бермоқда "Дунё" АА мухбири.

Тадбирда Хитойнинг савдо, саноат, қишлоқ хўжалиги, рақамли технологиялар, таълим, қурилиш ва бошқа соҳаларда фаолият олиб борувчи 100 яқин компаниялари вакиллари иштирок этди.

Тақдимот давомида Ўзбекистон ҳудудларининг иқтисодий ва инвестициявий салоҳияти, хорижий инвесторлар учун яратилган имкониятлар, жумладан, эркин иқтисодий ва саноат зоналари, улардаги мавжуд солиқ, божхона ва бошқа турдаги имтиёзлар ҳамда янги истиқболли инвестициявий лойиҳалар юзасидан батафсил маълумот берилди.

Шунингдек, иштирокчилар билан Ўзбекистонда бизнес юритиш афзалликлари тўғрисида фикр алмашилди ҳамда улар томонидан кўтарилган барча масалалар юзасидан батафсил маълумот берилди.

Тадбир давомида мамлакатимизнинг савдо-иқтисодий, инвестициявий ва туризм салоҳиятини намойиш этувчи видеороликлар намойиш этилди. Хитой компания вакиллари билан B2B ва G2B форматида учрашув ва музокаралар ўтказилди.

Ван Пин, Хэнан автомобилсозлик компанияси бош директори:

– Ўзбекистон элчихонасида ташкил этилган иқтисодий тадбирда иштирок этганимдан хурсандман.

Чунки, бу ерда мамлакатингизнинг савдо-иқтисодий ва инвестициявий салоҳияти ҳақида батафсил маълумот олиш имконига эга бўлдик. Юртингизда хитойлик инвесторлар учун яратилаётган шароитлардан мамнун бўлдик.

Компаниямиз автомобиллар учун эҳтиёт қисмлар ишлаб чиқариш билан шуғулланади. Шунингдек, механик ишлов бериш хизматларимиз ҳам мавжуд. Механик ишлов бериш тўғридан-тўғри якуний маҳсулот кўринишида ишлаб чиқариш ва мижозларга жўнатиш имконини беради.

Келгусида Ўзбекистон билан автомобиллар учун эҳтиёт қисмлар ишлаб чиқариш йўналишида ҳамкорлик қилишни режалаштиряпмиз.

Ху Чунцзин, Хитойнинг қурилиш моллари ишлаб чиқарувчи компанияси вакили:

– Мазкур форум Ўзбекистондаги бизнес муҳити ҳақида маълумот олиш ва янги ҳамкорларни топиш учун муҳим аҳамият касб этди.

Компаниямиз асосан қурилиш материаллари ва жиҳозларини ишлаб чиқаради. Тадбир давомида ўтказилган музокараларда ўзаро манфаатли лойиҳаларни амалга ошириш истиқболларини муҳокама қилдик.

Ҳамкорлигимиз орқали мамлакатларимиз ўртасидаги дўстлик алоқаларини мустаҳкамлашга ҳисса қўшишга тайёрмиз.