O‘zbekiston vakili Fransiyaning yuksak ordeni bilan taqdirlandi

Fransiya Madaniyat vazirligida O‘zbekiston Madaniyat va san’atni rivojlantirish jamg‘armasi raisi Gayane Umerovaga “San’at va adabiyot” (Ordre des Arts et des Lettres) ordeni kavaleri nishonini topshirish marosimi bo‘lib o‘tdi.

Fransiya madaniyat vaziri Rashida Dati O‘zbekistonda madaniyat sohasini rivojlantirish borasida amalga oshirilayotgan islohotlarni e’tirof etdi. Bu Fransiya bilan strategik sheriklik munosabatini mustahkamlashga xizmat qilayotgani ta’kidlandi.

 Ushbu yuksak mukofot O‘zbekistonning xalqaro madaniy aloqalarni mustahkamlash va san’at sohasida global muloqotni rivojlantirishga qo‘shgan sa’y-harakatlari va hissasining e’tirofidir, - dedi vazir Rashida Dati. - Hukumat, Prezident ma’muriyati va Fransiya Tashqi ishlar vazirligi, diplomatik korpus vakillari, madaniyat arboblari va xalqaro hamkorlar ishtirokida O‘zbekiston vakilining ushbu orden bilan taqdirlangani O‘zbekiston madaniy diplomatiyasi samaradorligining yorqin dalilidir.

Keyingi yillarda O‘zbekiston va Fransiya o‘rtasidagi madaniyat, san’at sohasidagi hamkorlik bir qator muhim tashabbuslar – Luvrda o‘zbek merosiga oid keng ko‘lamli ko‘rgazma, xalqaro madaniy anjumanlarda faol ishtirok etishgacha bo‘lgan ishlar tufayli yangi bosqichga ko‘tarildi.

Shu nuqtai nazardan, davlatimiz rahbari tashabbuslarini amalga oshirishda ustuvor loyihalarni amalga oshirayotgan O‘zbekiston madaniyati va san’atini rivojlantirish jamg‘armasi muhim o‘rin tutmoqda.

“San’at va adabiyot” ordeni kavaleri nishoni Fransiyada, shuningdek, butun dunyoda san’at va adabiyotning gullab-yashnashiga qo‘shgan xizmatlarini taqdirlash uchun har yil dunyo bo‘ylab 60ga yaqin kishiga beriladi.

B.Xudoyberdiyev,
O‘zA