Bahor ne’matlari

Yo‘l chekkasida bo‘y cho‘zgan giyohlarning foydasiyu xususiyatlari nimalardan iborat ekani haqida ko‘pincha o‘ylab ham ko‘rmaymiz.

Masalan, oftobrang qoqi o‘t uyqusizlik, ateroskleroz kabi xastaliklarni davolashda qo‘l kelsa, ismaloq damlamasi kamqonlik, tomoq, o‘pka, asab kasalliklariga davo sanaladi... Buyuk bobokalonimiz Abu Ali ibn Sinoning “Tib qonunlari” kitobida keltirilgan bu kabi ma’lumotlar hozir ham zamonaviy tibbiyotda keng qo‘llanib kelinmoqda.

O‘zbekiston Madaniyat va sport ishlari vazirligi tomonidan O‘zbekiston davlat tabiat muzeyi bilan hamkorlikda Keksalarni e’zozlash yiliga bag‘ishlab tashkil etilgan “Bahor ne’matlari” nomli ko‘rgazma ham yurtimizda o‘suvchi o‘simliklar, ularning shifobaxsh xususiyatlari haqida hikoya qiladi.

Ko‘rgazmaning ochilishida mamlakatimizda yoshlarni Vatanga muhabbat, istiqlol g‘oyalariga sadoqat ruhida tarbiyalash borasida amalga oshirilayotgan keng ko‘lamli islohotlar jarayonida navqiron avlodning ona tabiatga bo‘lgan mehrini oshirish masalasiga ustuvor ahamiyat qaratilayotgani ta’kidlandi.

350 mingdan ortiq eksponat saqlanayotgan O‘zbekiston davlat tabiat muzeyi o‘quvchi-yoshlarning ekologik madaniyatini yuksaltirish, ona tabiatga ehtiyotkorona munosabatda bo‘lishga, uning ne’matlaridan oqilona foydalanishga undash masalasiga alohida e’tibor qaratib kelmoqda. Bunda malakali biolog, ekolog kabi mutaxassislar bilan birga katta tajribaga ega, elda obro‘-e’tibor topgan otaxon va onaxonlar ishtirokida tashkil etilayotgan uchrashuvlar, ma’rifiy tadbirlar kutilgan samaralarni bermoqda.

– Yurtimizda o‘suvchi ko‘plab giyohlarning shifobaxsh xususiyatlari ilmiy izlanishlarda, tibbiyot, farmakologiya, oziq-ovqat sanoati va boshqa turli sohalarda samarali qo‘llaniladi, – deydi muzeyning katta ilmiy xodimi Feruza Akromxo‘jayeva. – Biroq tabiat ne’matlaridan besamar foydalanish, yer, suv resurslarini ifloslantirish o‘simlik dunyosiga ham o‘z salbiy ta’sirini o‘tkazmay qolmaydi. Ushbu ko‘rgazmadan ko‘zlangan asosiy maqsad yoshlarning tabiatga, o‘simlik dunyosiga ehtiyotkorona munosabatini shakllantirishdan iborat.

Ko‘rgazmada shifobaxsh o‘simliklardan namunalar, tabiat manzaralari aks ettirilgan fotosuratlar yosh tabiatsevarlar e’tiboriga havola etildi. Yoshi ulug‘ onaxonlar bahoriy ko‘katlar, ulardan tayyorlanuvchi taomlarning foydali xususiyatlari haqida yoshlarga atroflicha tushuncha berdilar.

Bu kabi ko‘rgazmalar Qoraqalpog‘iston Respublikasi va viloyatlardagi o‘lkashunoslik muzeylarida ham tashkil etilmoqda.

www.uza.uz